Máis aló da Conferencia

Un evento científico destas características representa unha oportunidade única para achegar o público á ciencia; é un momento para dar a coñecer á sociedade o traballo realizado polo persoal investigador nos campos da economía ecolóxica e o decrecemento ; sensibilizar á opinión pública sobre a necesidade de establecer novas formas de desenvolvemento social e abordar a transición ecolóxica ; implicar ao público no debate sobre a necesidade do decrecemento e as súas posibles formas ; e destacar a importancia de achegar a sociedade ás comunidades científicas, para que se entendan e establezan colaboracións. Con estes obxectivos en mente, a conferencia comprende diferentes actividades enfocadas ao público en xeral, facendo fincapé na participación da mocidade.

Como parte da conferencia, levarán a cabo unha serie de iniciativas destinadas a implicar á poboación en xeral e a fomentar a participación activa das persoas asistentes. Estes actos son escenario perfecto para que a cidadanía se implique en debates relacionados cos temas abordados durante a conferencia e incluirán diversas actividades como charlas, exposicións, obradoiros interactivos, mesas redondas, espazos de debate, representacións artísticas etc., ofrecendo unha plataforma para que a poboación en xeral se implique e participe activamente na conferencia.

O programa será público, e calquera persoa interesada poderá asistir de balde a estas actividades. Para facilitar a asistencia, a maioría delas desenvolveranse nas linguas locais, galego e castelán, e terán lugar en diversos espazos repartidos pola cidade, cunha distancia entre eles sempre inferior a dez minutos a pé. Os espazos abarcan a Casa dás Campás, o Museo Provincial de Pontevedra, entre outros.