Na actualidade, a ciencia moderna enfróntase a unha situación fundamental e, en última instancia, paradoxal : mentres que no ámbito científico aumentan as voces que cuestionan a interminable procura do crecemento e refutan o seu imaxinario, a maioría das institucións de ciencia, tecnoloxía e innovación (CTI) están en transición cara un modelo que prioriza e financia cada vez máis a investigación aplicada para impulsar o crecemento económico. Desde a enxeñería ata as ciencias aplicadas, a práctica e o discurso ao redor da CTI foron decisivos para adaptar a produción de coñecemento a unha expansión capitalista sen fin. Por tanto, unha sociedade que vaia máis aló do crecemento debe aprender a articular novos imaxinarios e a redefinir a relación existente entre a sociedade e as institucións da ciencia, a tecnoloxía e a innovación.
Necesitamos urxentemente desvincular a CTI da procura dun crecemento ilimitado e, con todo, non se reflexionou aínda o suficiente sobre esta importante tarefa. En gran medida, as conversacións sobre como reutilizar a CTI como fenómeno sociopolítico, desvinculado dos fins instrumentais da acumulación capitalista, mantivéronse á marxe da economía ecolóxica e o decrecemento. Cremos que xa é hora de trasladar esta conversa ao primeiro plano e fomentar unhas relacións máis abertas con colegas doutras disciplinas. Neste contexto, propoñemos o tema xeral “Tecnoloxía, ciencia e innovación máis aló do crecemento” como unha invitación aberta a interactuar con outras tradicións académicas que problematizan os imaxinarios e as prácticas tecnolóxicas, aínda que non establecesen unha conexión explícita cos debates sobre o decrecemento. De feito, esta conferencia ofrece, no momento xusto, a oportunidade de tender novas pontes entre o persoal académico que se centra en como o poder e a política dan forma á ciencia e a tecnoloxía e viceversa. A nosa conferencia permitirá establecer vínculos entre o decrecemento, a economía ecolóxica e outras comunidades das ciencias sociais, incluídos os estudos sobre ciencia, tecnoloxía e sociedade (CTS), os estudos críticos en xestión e organización, os estudos sobre investigación e innovación responsables e outros.
A continuación presentamos unha serie de posibles temas e preguntas xerais que poden orientar este debate. Cando se abra o prazo, as persoas solicitantes remitirán os seus traballos a un dos 13 bloques temáticos propostos, non aos subtemas específicos. Os subtemas son indicativos do contido que podería encaixar en cada un deses 13 bloques, pero acéptanse tamén propostas sobre temas que non figuren explicitamente nas listaxes.
Descarga aquí a chamada para o envío de resumos e os bloques temáticos.